ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហោះរូបមួយសន្លឹកពាក់កណ្ដាលខ្លួនគឺជារូបសម្ដេចក្នុងសម្លៀកបំពាក់អាវធំមានពាក់កម្រងផ្កា ដែលមើលទៅអាចក្នុងវ័យដែលសម្ដេចមានអាយុខ្ទង់៤០ឆ្នាំ។

ទោះជាយ៉ាងណាសម្ដេចតេជោ ថាសម្ដេចមិនដែលបានឃើញរូបនេះពីមុនមកទេខណៈសួររកប្រភពនៃរូបថតនេះផងដែរ។

សម្ដេចតេជោបានសរសេរបង្ហោះនៅព្រឹកនេះថា៖ «យប់មិញខ្ញុំទទួលបានរូបថតមួយសន្លឹកពីmessenger របស់ចៅគីមដែលជារូបថតដែលខ្ញុំមិនដែលបានឃើញហើយក៏មិនដឹងថាថតនៅកន្លែងណានិងឆ្នាំណា? សូមបងប្អូនដែលបានដឹងពីប្រភពរូបថតនេះមេត្តាជួយផ្តល់ព័ត៌មានផង» ។

ជានាយករដ្ឋមន្ត្រីនៃប្រទេសមួយក្លាយជាបុគ្គលសាធារណៈដែលពលរដ្ឋគ្រប់រូបស្គាល់ ក្លាយជាអ្នកនៅចំពោះមុខកាមេរ៉ាជានិច្ច។ កាលពីថ្ងៃទី៣ ខែឧសភា ឆ្នាំ២០១៩ សម្ដេចមានការពេញចិត្តចំពោះរូបថតពីរសន្លឹកដែលបានថតសម្ដេចនៅពេលដែលសម្ដេចអញ្ជើញទៅគោរពវិញ្ញាណក្ខន្ធលោក ឡេ ឌឹកអញ់ នៅប្រទេសវៀតណាម ពេលនោះសម្ដេចបានបង្ហោះសួររក និងអរគុណអ្នកដែលបានថតនោះផងដែរ៕